אונדזער ציל איז דאָס שטיצן די מאָדערניזירונג, סטאַנדאַרדיזירונג און באַניץ פֿון דער ייִדישער שפּראַך אין אַלע ספֿערן פֿון טאָג–טעגלעכן לעבן, ווי אָפּגעשפּיגלט אין אונדזער סאָציאַלער מעדיע, ווידעאָ און געדרוקטע רעסורסן.
מיט מער ווי 84,000 איינסן און סובאיינסן הייבט דאָס פּרעמירטע ווערטערבוך אַרויס ייִדיש ווי אַ לעבעדיק לשון וואָס מע רעדט נאָך אַלץ אין פֿאַרשידענע עקן וועלט. באַזירט אויף די לעקסישע זאַמלונגען פֿונעם פֿאַרשמטן לינגוויסט ד״ר מרדכי שעכטער, וואָס האָט געפֿאָרשט און געזאַמלט דאָס גערעדטע און ליטעראַרישע ייִדיש אין אַלע זײַנע פֿאָרמען, שפּיגלט אָט דאָס היסטאָרישע ווערטערבוך אָפּ זײַן וויזיע פֿאַר אַ מאָדערנעם און צוקונפֿטיקן באַניץ פֿון ייִדיש.
יעדע וואָך צעשיקן מיר רשימות ווערטער לויט דער טעמע – אויף דער סאָציאַלער מעדיע און דורך אונדזער בליצפּאָסט–רשימה. עטלעכע הונדערט אַזוינע טעמאַטישע רשימות האָבן זיך שוין באַוויזן אין משך פֿון די יאָרן זינט מיר האָבן דאָס איניציִיִרט אין 2013, און אויף פֿאַרשידענע טעמעס: די קיך, פּאָליטיק, יום–טובֿים, ספּאָרט, קליידער, חיות, געזונט און אַ סך אַנדערע.
אויף אונדזער יוטוב–קאַנאַל קענט איר הערן פֿאַרכאַפּנדיקע אינטערוויוען אויף ייִדיש וועגן דער ייִדישער וועלט בײַם הײַנטיקן טאָג. צי איר באַקענט זיך מיט אַ געוועזענעם חסיד, אַ לעבנסלאַנגן בונדיסט צי אַ ייִדישן לינגוויסט, איז אונדזער קאַנאַל אַן אויסערגעוויינלעך מיטל צו הערן דאָס גערעדטע ייִדיש אויף פֿאַרשידענע טעמעס.
כּדי צו העלפֿן ייִדיש–סטודענטן, גיבן מיר אַרויס ייִדישע טעקסטביכער און סטודענטיש לייענוואַרג – אַלע מיטן טראָפּ אויף אַ קאָרעקטן גראַמאַטישן באַניץ, דעם רײַכן וואָקאַבולאַר פֿון דער שפּראַך, און שמועסן אויף אַ לײַטישן אופֿן.
„אַ װעלט מיט װעלטעלעך: שמועסן מיט ייִדישע שרײַבערס“ דאָקומענטירט פֿיר באַקאַנטע הײַנטצײַטיקע ייִדישע שרײַבערס וואָס דערציילן וועגן זייערע פֿאַרכאַפּנדיקע לעבנס און ווערק. יעדער פֿילם איז אַן אינטערװיו, באַרײַכערט מיט פֿאָטאָגראַפֿיעס און מוזיק, דורכגעפֿירט אין גאַנצן אױף ייִדיש מיט ענגלישע אונטערקעפּלעך.