מיט דעם דאָזיקן נומער האָבן מיר זיך באַמיט צו שאַפֿן אַ תּיכּפֿדיקן און אַקטועלן היסטאָרישן דאָקומענט וואָס זאָל נישט בלויז ברענגען פֿאַקטן פֿון דער רוסישער אַגרעסיע קעגן דער אוקראַיִנע, נאָר איבערגעבן אויטענטישע אײַנדרוקן פֿון ביידע צדדים פֿונעם קאָנפֿליקט. גלײַכצײַטיק ווערט דער לייענער אַליין אַן עדות דערפֿון, וויפֿל ייִדיש־טוערס און שעפֿערישע כּוחות עס געפֿינען זיך בײַם הײַנטיקן טאָג אי אין דער אוקראַיִנע אי אין רוסלאַנד: היסטאָריקער, ליטעראַטן, קינסטלער — ווי אויך אַ שלל מיט ייִדיש־מאַטעריאַלן וואָס בלײַבן נאָך אומדערפֿאָרשט.
